საკუთარ თავზე რომ იტყვი "კაცი ვარო" მანდ უკვე ბანძი ხარ, "ნუ @ლე" "სავსემ პეწიტ" - ვისზე საუბრობს ირაკლი ოქრუაშვილი

თავდაცვის ყოფილი მინისტრი, ირაკლი ოქრუაშვილი გუშინ, "პირველი არხის" ეთერში თბილისის მერობის კანდიდატებს შორის გამართულ დებატებს სოციალურ ქსელში ეხმაურება და "ქართული ოცნების" მერობის კანდიდატს, კახა კალაძეს გიორგი გახარიასთან დებატებისას გაკეთებული განცხადების გამო აკრიტიკებს: "ჯერ კაცი ვარ და მერე პოლიტიკოსიო, კალაძემ. საკუთარ თავზე რომ იტყვი "კაცი ვარო" მანდ უკვე ბანძი ხარ, იმიტომ რომ ეგ სხვამ უნდა თქვას შენზე. და პოლიტიკოსს რომ კნინობით ახსენებ კაცთან მიმართებაში, ანუ რაც ხარ იმასთან მიმართებაში, კაცობას გამორიცხავ და ის ხარ რაც ილია ჭავჭავაძემ თქვა, კაცის ცნებას კაცურის დამატება დასჭირდაო. "ნუ კლე" "სავსემ პეწიტ"... მოკლედ, იმდენი კაляძე შემხვდა აქ წუხელის, რომ სიზმარში მილანში ვიყავი და კორნელიანის პიჯაკს ვყიდულობდი. ერთსაც ვიტყვი მაგ თემაზე და "ვსიო". უემოციო და ინტელექტისგან ცარიელი ხალხის თავყრილობა იყო გუშინდელი "დებატები". მიშა ქუმსიშვილის ნაბიჯს თუ არ ჩავთვლით. ეგრეა, როდესაც დაყენებულ კამერასთან უკნიდან რომ იმიჯმეიკერი გავარჯიშებს და სინამდვილეში თავში არაფერი გიყრია. ჰოი, დიდო ვახტანგ გორგასალო! რაღა მაინცდამაინც მანდ გადაწყვიტე ნადირობა, ხომ შეიძლებოდა იმ დღეს ქათმის ჩახოხბილი გეჭამა ან ის ხოხობი საერთოდ განაბულიყო შენი მარეკების ხმაზე. მაგრამ რას იზამ, "რაცა ღმერთსა არა სწადდეს, არა საქმე არ იქმნების"-ო" - წერს პარტია "გამარჯვებული საქართველოს" ლიდერი, ირაკლი ოქრუაშვილი "ფეისბუქის" პირად გვერდზე და დედაქალაქის მოქმედი მერის, ნიგერიელ ბიზნესმენთან - რიჩარდ არინზე ოგბუნუჯუსთან ერთად გადაღებულ სელფს აზიარებს.

შეგახსენებთ, რომ 21 სექტემბერს, საქართველოს პირველი არხის ეთერში, გადაცემა "დებატები 2021" -ი გაიმართა, სადაც მონაწილეობა დედაქალაქის მერობის ყველა კანდიდატმა მიიღო. დებატებისას პარტია "საქართველოსთვის" თბილისის მერობის კანდიდატმა, გიორგი გახარიამ კალაძეს კითხვით მიმართა, იზიარებდა თუ არა ის თანაგუნდელების ბრალდებებს მის მიმართ, რაზეც მოქმედმა მერმა ყოფილ პრემიერს შემდეგი პასუხი გასცა: "ნარკომანობასთან დაკავშირებით, მე მგონი, არავის დაუბრალებია და არავის უთქვამს, რომ გიორგი გახარია ნარკომანია. რაც შეეხება, გიორგი, შენს საქციელს, მე ეს პირდაპირ ეთერშიც ვთქვი, შენც გითხარი და არ დავმალავ – მე არ მომეწონა შენი გადაწყვეტილება, რომელიც თებერვალში მიიღე. მე არ შევალ შინაარსში და არ მინდა, ამაზე ვისაუბრო. ყოველთვის მაქსიმალურად ვცდილობ, ვიყო თავშეკავებული, როდესაც კითხვა ისმება გიორგი გახარიასთან დაკავშირებით. მე უპირველესად, ვარ კაცი და მერე ვარ პოლიტიკოსი. შესაბამისად, ადამიანებთან ურთიერთობას გარკვეულ როლსა და უპირატესობას ვანიჭებ, ამიტომ არ მინდა ამ დისკუსიაში შემოსვლა. თბილისმა და თბილისელებმა გადაწყვიტონ ყველაფერი". ცნობისთვის, მმართველი გუნდის მხრიდან არაერთხელ ითქვა, რომ გიორგი გახარია ნარკოტიკების მომხმარებელია. "ქართული ოცნების" თავმდჯომარემ, ირაკლი კობახიძემ მას "კოკაინშიკიც" კი უწოდა, ხოლო მას შემდეგ, რაც ყოფილმა პრემიერმა ნარკოტესტი ევროპაში ჩააბარა, მმართველი პარტიის ლიდერმა განაცხადა რომ "ბანკებით" სირბილს მას ურჩევნია კოკაინს შეეშვას.